Bərdədə ətraf mühitin çirkləndirilməsi ilə bağlı 15 nəfər cərimələnib. Bu barədə 17 iyul tarixində Daxili İşlər Nazirliyi İnsanoid-ə məlumat verib.
Belə ki, Bərdə Rayon Polis Şöbəsi əməkdaşlarının sanitariya-gigiyena qaydalarının pozulması hallarının qarşısının alınması məqsədilə rayon ərazisində keçirdikləri tədbirlər zamanı sənaye və məişət tullantılarının qalaqlanması, eləcə də yandırılması zamanı ətraf mühitin mühafizəsi tələblərinə əməl edilməməsi faktları aşkar olunub.
İnzibati Xətalar Məcəlləsinin “sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi” maddəsinin tələblərini pozduqlarına görə rayonun Yeni Əyricə və Kərimbəyli kəndlərinin bələdiyyə sədrləri barəsində inzibati tənbeh tədbiri tətbiq olunub.
Ərazinin zibillənməsi halları ilə bağlı keçirilən digər tədbirlərlə 15 nəfər barəsində “məişət tullantılarının tutumlardan (urnalardan) kənar yerlərə atılmasına görə” maddəsinin tələbini pozduğuna görə inzibati qaydada protokol tərtib olunub.
Cari il ərzində rayon ərazisində bu istiqamətdə keçirilən tədbirlər nəticəsində ümumilikdə 301 nəfər barəsində müvafiq qaydada protokollar tərtib edilib.
