Novruz bayramı ilə əlaqədar ölkədə 9 gün tətil olacaq. Bu qeyri-iş günlərində yeni açılmış Bakı Zooparkı ziyarətçilər üçün açıq olacaqmı? Məsələ ilə bağlı məkandan İnsanoid-ə məlumat verilib.
Bildirilib ki, zoopark adi rejimdə işləyəcək. Kassalar həftənin beş günü saat 10:00-dan 17:30-a kimi açıq olacaq. Şənbə və bazar günləri isə kassalar səhər 9:00-dan fəaliyyət göstərəcək.
Biletlərin qiyməti uşaqlar və tələbələr üçün 2 manat, böyüklər üçün 5 manat, xarici vətəndaşlar üçün isə 10 manat təşkil edir. Üç yaşa qədər uşaqlar və şəhid ailələri üçün giriş pulsuzdur. Biletləri, həmçinin iticket.az saytından əldə etmək olar.
Heyvanat parkı 1928-ci ildə yaradılmışdır. 2019-cu ilin fevral ayından etibarən zoopark təmir-tikinti işlərinə görə bağlanılmışdır. Yenidənqurma işlərindən sonra zooparkın ərazisi 2,25 hektardan 4,25 hektara çatdırılıb. Hazırda zooparkdakı heyvan növlərinin ümumi sayı 125, “Qırmızı kitab”a düşən növlərin sayı isə 22-dir.
