Biləsuvar rayonunun Çaylı kəndində internet xəttinin çəkilişi yarımçıq qalıb. Bu barədə İnsanoid bu gün, 4 avqust tarixində Report-a istinadən xəbər verir.
Kənd sakinləri kənddə sadəcə 10 evə internet xətti çəkildiyini və həmin evlərdə də internetin sürətinin çox aşağı olduğu bildiriblər.
İnternetin sürəti zəif olduğu üçün sakinlər ödənişli paketlər götürməyə məcbur olurlar. Bu isə əlavə xərclərin artmasına səbəb olur.
Kənd sakinləri aidiyyəti qurumlara müraciət edərək problemlərinin aradan qaldırılmasını xahiş ediblər.
Məsələ ilə bağlı “Aztelekom” MMC bildirib ki, Rəqəmsal İnkişaf və Nəqliyyat Nazirliyinin həyata keçirdiyi layihə çərçivəsində müxtəlif tutumlu mis kabellər istismardan çıxarılaraq kütləvi şəkildə müasir standartlara cavab verən fiber-optik kabellərlə əvəzlənir.
Layihə çərçivəsində görülən işlər nəticəsində Çaylı kəndinin də 2024-cü ilin sonuna kimi GPON texnologiyası ilə təmin olunacağı planlaşdırılır.
Bundan başqa, məlumatda vurğulanıb ki, hazırda kənddə internet xidmətinin təminatı istiqamətində “Aztelekom” tərəfindən kütləvi nasazlıq müşahidə olunmur:
"Ümumiyyətlə, şəbəkə daim nəzarətdə saxlanılır. Əgər hər hansı bir dəyişiklik qeydə alınarsa, yaxud müraciət daxil olarsa, mütəxəssislər mövcud vəziyyətin araşdırılması istiqamətində işə başlayırlar. Fərdi ev təsərrüfatlarında texniki nasazlığın baş verməsi mümkündür. Belə hallarda da abunəçilərin müraciəti əsasında internet xidmətində yaranan texniki nasazlıqlar nəzarətə götürülərək aradan qaldırılır", - qurumdan bildirilib.
