Azərbaycan Prezidenti İlham Əliyev Avropa İttifaqının (Aİ) sammitində iştirak etmək üçün dekabrın 13-də Belçikanın paytaxtı Brüsselə səfər edib. Bu barədə Prezidentin rəsmi səhifəsində məlumat yerləşdirilib.
Brüsseldə yaşayan azərbaycanlılar İlham Əliyevi qarşılamağa çıxıblar. Onlar əllərində fransız və ingilis dillərində “Cənab Prezident, xoş gəlmisiniz!”, “Avropa azərbaycanlıları Sizi salamlayır!”, “Azərbaycan ümumi dəyərlərə hörmət edir!” sözləri yazılmış plakatlar, eyni zamanda, Azərbaycanın və Avropa İttifaqının bayraqlarını tutublar.
Qeyd edək ki, ölkə başçının səfər çərçivəsində dekabrın 14-ü və 15-i Brüsseldə bir neçə görüşü nəzərdə tutulub. Dekabrın 14-də Aİ Şurasının Prezidenti Şarl Mişel, Azərbaycan Prezidenti İlham Əliyev və Ermənistanın Baş naziri Nikol Paşinyan arasında üçtərəfli görüş keçiriləcək. Azərbaycan lideri, həmçinin Brüsseldə NATO-nun Baş katibi Yens Stoltenberq ilə görüşəcək.
Dekabrın 15-də isə İlham Əliyev “Şərq Tərəfdaşlığı” Sammitində iştirak edəcək.
[gallery size="large" ids="16785,16786,16788"]
