Hər il 10 oktyabr tarixi yanğınsöndürənlərin peşə bayramı günü kimi qeyd olunur.
10 oktyabr 1918-ci ildə Azərbaycan Xalq Cümhuriyyəti yarandıqdan sonra Yanğından Mühafizə Xidməti Dövlət Xidməti statusunu aldı. Bu günün qeyd edilməsi ümummilli lider Heydər Əliyevin 5 oktyabr 2002-ci ildə imzaladığı Sərəncama əsasən qəbul olunub.
Azərbaycanda yanğından mühafizə sistemi XIX əsrin sonlarında yaranıb. Buna səbəb isə Bakıda baş verən ilk neft bumu və şəhərin inkişafı olmuşdur. Şəhər yanğınsöndürmə idarəsinin yaradılması ideyası mesenat Hacı Zeynalabdin Tağıyevə məxsusdur. Beləliklə, 6 dekabr 1886-cı ildə Şəhər hakimiyyəti tərəfindən bu xidmət yaradıldı.
6 iyul 1998-ci ildə Azərbaycan Respublikası Daxili İşlər Nazirliyinin Baş Dövlət Yanğın Təhlükəsizliyi İdarəsi yarandı. 16 dekabr 2005-ci ildə İlham Əliyevin imzaladığı Sərəncama əsasən, Azərbaycanda Fövqəladə Hallar Nazirliyi yaradıldı və Baş Dövlət Yanğın Təhlükəsizliyi İdarəsi bu strukturun tabeliyinə verildi. 19 aprel 2006-cı ildə FHN-in strukturunda həmin idarə yenidən təşkil edilmiş və Dövlət Yanğından Mühafizə Xidməti adlandırılmışdır.
