1997-ci ildən ümummilli lider Heydər Əliyevin Sərəncamı ilə hər il 2 fevral Azərbaycanda Gənclər Günü kimi qeyd olunur. 2023-cü ilin statistik məlumatına görə, Azərbaycanda 14-29 yaş arası insanların sayı 2 milyon 295 mini ötür və əhalinin 22,7 faizini təşkil edir.
Gənclər Günü münasibətilə İnsanoid sizə müxtəlif sahələrdə uğur qazanan 5 gəncimiz haqda məlumatı təqdim edir:
- Reyhan Camalova - 21 yaş, ixtiraçı
Reyhan yağış suyundan enerji istehsal edən “Rainergy” qurğusunu yaradıb. O, 15 yaşında olarkən, 2017-ci ildə Hindistanda keçirilən Qlobal Sahibkarlıq Sammitində bu layihə ilə Azərbaycanı təmsil edib. Burada keçmiş ABŞ prezidenti Donald Trampın qızı İvanka Tramp onun nailiyyətini təqdir edib. Reyhan Camalova, həmçinin ABŞ-nin Forbes jurnalının sənaye, istehsal və enerji sahəsində “30 yaşa qədər 30 gənc tədqiqatçı” siyahısına daxil edilib. O, hazırda ABŞ-nin Pensilvaniya Universitetində ali təhsilini davam etdirir.
[gallery link="file" columns="1" size="full" ids="160846"]
- Ayan Allahverdiyeva - 18 yaş, şahmatçı
14 yaşlı qızlar arasında iki dəfə Avropa çempionu olmuş Ayan 2023-cü ilin noyabrında İtaliyanın Montesilvano şəhərində qız və oğlanlar arasında keçirilən 18 yaşadək şahmatçılar arasında dünya çempionatında da qızıl medal qazanıb.
[gallery link="file" columns="1" size="full" ids="160850"]
- Emil Zeynalzadə - 23 yaş, aşpaz
Emil 2023-cü ildə Hindistanda keçirilən 50-dən çox ölkədən gənc aşpazların iştirak etdiyi 9-cu Beynəlxalq Gənc Aşpazlar Olimpiadasının Qızıl Kubokunu qazanıb.
[gallery link="file" columns="1" size="full" ids="160849"]
- Hidayət Heydərov - 26 yaş, cüdoçu
Cüdo üzrə 73 kq çəki dərəcəsində çıxış edən 3 dəfə Avropa çempionu olmuş Hidayət, həmçinin 2023-cü ildə Tokioda (Yaponiya) keçirilən Böyük Dəbilqə turnirində qızıl medal qazanıb. O, Yaponiyada fəxri kürsünün ən yüksək pilləsinə qalxan ilk Azərbaycan cüdoçusu olub.
[gallery link="file" columns="1" size="full" ids="160848"]
- Jony - 27 yaş, müğənni
Səhnədə “Jony” kimi tanınan Cahid Hüseynli “Комета”, “Френдзона”, “Звезда”, “Аллея”, “Пустой стакан”, HammAli & Navai ilə birlikdə oxuduğu “Без тебя я не я” və digər mahnıları ilə Rusiyada və postsovet məkanında məşhurluq qazanıb. 2021-ci ildə Cahid “Maska” adlı musiqili şounun qalibi olub. O, “Spotify” striminq xidmətinin versiyasına görə, ən çox dinlənilən rusiyalı sənətçilərin ilk 10-luğunda birinci yeri tutub.
[gallery link="file" columns="1" size="full" ids="160881"]
