Bu gün Azərbaycanda Milli Qurtuluş Günüdür.
Ölkədə siyasi-iqtisadi vəziyyətin çətin olduğu bir dövrdə ümummilli lider Heydər Əliyevin 31 il öncə hakimiyyətə qayıtması ilə Azərbaycan parçalanmadan xilas olur.
Ulu öndər Heydər Əlliyevin siyasətini layiqincə yerinə yetirən hazırda Silahlı Qüvvələrin Ali Baş Komandanı Prezident İlham Əliyev Azərbaycanın ərazi bütövlüyünü, suverenliyini bərpa etdi.
30 ilə yaxın müddət ərzində düşmənin zəbt etdiyi torpaqlarımızı əsarətdən qurtaran Müzəffər Ali Baş Komandan Azərbaycanın və azərbaycanlıların dünyada, həmçinin siyasi arenadakı nüfusunu da qaldırmış oldu.
Heydər Əliyev 1993-cü il iyunun 20-də Azərbaycan həqiqətlərinin dünya ictimaiyyətinə çatdırılması üçün yerli və xarici jurnalistlərlə brifinq keçirib, iyunun 21-də isə bir sıra ölkələrin diplomatları ilə görüşüb. Bu sahədə yürüdülən siyasət respublikanı informasiya blokadasından çıxartdı. Dünyada Azərbaycanla bağlı formalaşan fikri müsbət yöndə dəyişdi. Məhz belə bir mürəkkəb siyasi şəraitdə Heydər Əliyevin böyük potensialı Azərbaycanın müstəqilliyinin qarantına çevrildi. Ümummilli liderin şəxsiyyəti, onun özünəməxsus siyasi idarəetmə qabiliyyəti, qətiyyəti və xarizması siyasi böhrana son qoydu və Azərbaycanın dünya birliyinə inteqrasiyası başlandı.
1997-ci ildə Milli Məclisin deputatları 15 iyun tarixinin təqvimə Azərbaycan Respubıikasının Milli Qurtuluş Günü kimi salınması təklifi ilə çıxış ediblər və parlament bu təklifi bəyənib. Həmin vaxtdan Heydər Əliyevin yenidən hakimiyyətə qayıdışı Milli Qurtuluş Günü kimi qeyd edilir.
