Səttar Bəhlul oğlu Bəhlulzadə 15 dekabr 1909-cu ildə Bakının Əmircan qəsəbəsində anadan olub.
Bəhlulzadə 1927-1931-ci illərdə indiki Əzim Əzimzadə adına Azərbaycan Dövlət Rəssamlıq Məktəbində təhsil alıb. O, “Kommunist” qəzetində qrafik rəsmləri çəkməklə yaradıcılığa başlayıb. Rəssamın müasir məzmunlu ilk karikaturaları 1931-1933-cü illərdə qəzetdə çap olunub.
Səttarı öz davamçısı kimi görən Əzim Əzimzadə onun rəsm sahəsində ali təhsil almağını istəyib. Buna görə Səttar Moskvaya yollanıb və 1933-cü ildə Moskva Dövlət Rəssamlıq İnstitutuna daxil olub. Başqalarından fərqli olaraq, o, diplom müdafiəsində bir yox, iki əsər hazırlayıb. Lakin İkinci Dünya müharibəsinin başlaması ona diplomunu müdafiə etməyə imkan verməyib. Buna görə Səttar Bakıya qayıdıb. Sonralar onu Moskvaya diplom müdafiəsi üçün dəvət etsələr də, o etiraz edib.
Bəhlulzadə əsərlərini heç vaxt sifarişlə yaratmayıb. Buna görə o, “Sonuncu dərviş” kimi tanınıb. Bəhlulzadənin “Xəzər gözəli”, “Əbədi məşəllər”, “Kəpəzin göz yaşları”, “Vətənimin baharı”, “Azərbaycan nağılı” kimi əsərləri var.
Səttar Bəhlulzadə 14 oktyabr 1974-cü ildə Moskvada vəfat edib və Əmircan qəsəbəsində, anasının yanında dəfn olunub.
