Leyla Ağalar qızı Bədirbəyli 8 yanvar 1920-ci ildə Bakıda anadan olub.
O, uşaqlıqdan anası ilə birlikdə tez-tez rəqs dərnəyinə gedib, o zamanlar aktrisanın incəsənətə marağı yaranıb. Bədirbəyli 1937-1942-ci illərdə Azərbaycan Dövlət Filarmoniyasının Mahnı və Rəqs ansamblında solist olub. 1952-ci ildə o, indiki Azərbaycan Dövlət Mədəniyyət və İncəsənət Universitetini bitirib.
Bəstəkar Üzeyir Hacıbəyovun dəvəti ilə aktrisa 1945-ci ildə “Arşın mal alan” filmində Gülçöhrə obrazını canlandırmışdır. Onun gözəlliyini və ifasını bəyənən Stalin Leyla Bədirbəylini “əsl Şərq gözəli” adlandırmışdır. Aktrisa, həmçinin “Dərviş Parisi partladır”, “Dəli Kür”, “Fətəli xan”, “Görüş”, “Koroğlu” kimi filmlərdə çəkilib.
O, 1946-cı ildə Stalin mükafatına, 1959-cu ildə isə Azərbaycan SSR Xalq artisti adına layiq görülüb.
Leyla Bədirbəyli 23 noyabr 1999-cu ildə vəfat edib. O, Bakıda Birinci Fəxri xiyabanda dəfn olunub.
