27 sentyabr 2020-ci ildə işğal altında qalan torpaqların azad edilməsi məqsədi ilə İkinci Qarabağ müharibəsi başladı. Həmin ilin 8 noyabr tarixində rəşadətli Azərbaycan Ordusu ən ağır hərbi əməliyyatlardan birini - strateji mövqeyi ilə seçilən Şuşa şəhərini azad etdi.
2 dekabr 2020-ci ildə Zəfər Gününün təsis edilməsi haqqında ilk Fərman verilmişdi və ona əsasən, bu bayram hər ilin 10 noyabrında keçirilməli idi. Lakin Türkiyədə Mustafa Kamal Atatürkün anım günü olduğundan, 3 dekabr 2020-ci ildə Azərbaycan Respublikasının Prezidenti İlham Əliyev Zəfər Gününün 8 noyabr tarixinə dəyişdirilməsi barədə qərar qəbul etdi.
44 gün davam edən müharibə ərzində Müzəffər Azərbaycan Ordusu Cəbrayıl, Füzuli, Zəngilan, Qubadlı və Şuşanı işğaldan azad etdi. 10 noyabr 2020-ci ildə imzalanmış üçtərəfli bəyanata uyğun olaraq, Ağdam, Kəlbəcər və Laçın rayonları qan tökülmədən Azərbaycana qaytarıldı.
8 may 1992-ci ildə Azərbaycana qarşı hərbi təcavüzə başlamış Ermənistan tərəfindən Şuşa işğal edilmiş və onun ərazisində olan tarixi abidələr dağıdılmışdır. Bu günə kimi Şuşada 15 tarixi abidə tam bərpa olunmuşdur.
