Bugün, dekabrın 14-də Azərbaycan müğənnisi, SSRİ xalq artisti, Dövlət mükafatları laureatı, Sosialist Əməyi Qəhrəmanı Rəşid Behbudovun doğum günüdür. İncəsənət xadiminin dünyaya gəlməsindən 106 il ötür.
Sənətçi 1915-ci ildə Tiflisdə xanəndə Məcid Behbudovun ailəsində anadan olub. 15 yaşında ifaçılığa başlayan müğənni Azərbaycan Dövlət Filarmoniyasının, Opera və Balet teatrının solisti, dövlət konsert ansamblının təşkilatçısı və rəhbəri olub. 1966-cı ildə isə o, musiqi və estrada sənətinin balet, pantomima kimi müxtəlif janrlarını özündə birləşdirən Mahnı Teatrını təşkil edib, həmçinin bu teatrın solisti və bədii rəhbəri olub.
Rəşid Behbudov populyarlığını "Arşın mal alan" filmində çəkildikdən sonra qazanıb. O, bu filmdəki Əsgər roluna görə "Stalin mükafatı" ilə təltif olunub. Səhnədə olduğu 55 il ərzində ifaçı dünyanın 100-dən çox ölkəsinə səfər edib. Sənətkar Dağıstanın xalq artisti, Gürcüstanın əməkdar incəsənət xadimi və digər fəxri adlara sahib olub.
Xalq artisti 1989-cu il iyunun 9-da Moskva şəhərində vəfat edib. Onun məzarı Fəxri Xiyabanda yerləşir.
