Ağdaşda narkotiklərin qanunsuz dövriyyəsinə və oğurluğa görə 18 nəfər saxlanılıb. Bu barədə 16 avqust tarixində İnsanoid-ə Daxili İşlər Nazirliyindən məlumat verilib.
Narkotik tərkibli bitkilərin kultivasiyası, narkotik vasitələrin qanunsuz dövriyyəsi ilə məşğul olan və oğurluq etməkdə şübhəli bilinən 18 nəfər saxlanılıb.
Rayonun Yuxarı Qəsil və Kükəl kəndləri ərazisindəki otlaq sahəsindən xırdabuynuzlu heyvanlar oğurlanıb.
Qeyd olunan cinayəti törətməkdə şübhəli bilinən Sabirabad rayon sakini Rəhilə Qurbanova, onunla qeyri-rəsmi münasibətdə yaşayan Ayaz Vəliyev və qadının yetkinlik yaşına çatmayan qohumu saxlanılıb.
Saxlanılan şəxslərin ayrı-ayrı tarixlərdə oğurladıqları heyvanları A.Vəliyevə məxsus avtomobillə Kürdəmir rayonuna apararaq orada satdıqları, əldə etdikləri pulu isə öz aralarında böldükləri müəyyən olunub.
Keçirilən digər əməliyyatlar nəticəsində isə narkotik tərkibli bitkilərin kultivasiyası ilə məşğul olan rayon sakinləri - Rafiq Hacıyev, Elsevər Zakirov, Qurban Şəkərəliyev, Elşad Qədirov və Elnur İbişov saxlanılıblar.
Onların xüsusi qulluq göstərməklə yetişdirdikləri ümumi çəkisi 25 kiloqrama yaxın çətənə kolları, eləcə də Rafiq Hacıyev və Elsevər Zakirovdan əlavə qurudulmuş marixuana da aşkarlanaraq götürülüb.
Rayon ərazisində narkotik vasitələrin satışını, həmçinin qanunsuz dövriyyəsini təşkil edən şəxslərə qarşı keçirilən əməliyyatlar zamanı isə daha 10 nəfər saxlanılıb. Onlardan ümumilikdə 2 kiloqramdan artıq müxtəlif növ narkotik vasitələr aşkarlanaraq maddi sübut kimi istintaqa təqdim olunub.
Faktlarla bağlı araşdırmalar davam etdirilir.
