İrandan Azərbaycana narkotik vasitələri qaçaqmalçılıq yolu ilə gətirən daha 2 nəfər saxlanılıb. Bu barədə 10 avqust tarixində İnsanoid-ə Daxili İşlər Nazirliyindən məlumat verilib.
Abşeron rayonu ərazisində əvvəllər məhkum olunmuşlar - 34 yaşlı Zahid Məmmədov və 25 yaşlı Qabil Muradov saxlanılıblar.
Həmin şəxslərdən və idarə etdikləri avtomobildən 91 kiloqram, o cümlədən güclü təsirə malik 22 kiloqram heroin, 23 kiloqram “patı”, “şüşə” kimi adlandırılan metamfetamin, tərkibi psixotrop maddələrlə zənginləşdirilən 46 kiloqram qurudulmuş marixuana və 4300 ədəd "Metadon" həbi aşkar edilib.
Zahid Məmmədov və Qabil Muradovun mütəşəkkil dəstə yaradaraq İran vətəndaşı "Səxavət" adlandırılan şəxslə qabaqcadan əlbir olmaqla ölkəyə narkotik vasitə və psixotrop maddələr gətirən əsas fiqurlardan olmaları və narkotiklərin dövriyyəsini təşkil etmələri məlum olub.
Dəstə üzvləri narkotikləri Abşeron rayonu ərazisində yol kənarında gizlədilən yerdən ayrı-ayrı şəxslərə çatdırıb, pul qazanmaq məqsədilə əldə ediblər.
Faktla bağlı cinayət işi başlanılıb, dəstə üzvləri barəsində həbs qətimkan tədbiri seçilib.
Mütəşəkkil dəstəyə daxil olan digər şəxslərin saxlanılması istiqamətində əməliyyat-axtarış və əməliyyat-istintaq tədbirləri davam etdirilir.
