Göyçayda “Həbib” adlı İran vətəndaşı tərəfindən narkokuryerliyə cəlb edilən və onun ölkəyə göndərdiyi narkotik vasitələri respublikanın müxtəlif bölgələrinə çatdıran şəxs tutulub.
Bu haqda 20 iyul tarixində İnsanoid DİN-in Mətbuat Xidmətinə istinadən məlumat verib.
Tərtər rayon sakini, əvvəllər də məhkum olunmuş Səbuhi Əlizadə saxlanılıb. Onun üzərində axtarış aparılan zaman 3 kiloqrama yaxın qurudulmuş marixuana və 1 000 ədəd psixotrop tərkibli həb aşkar edilərək götürülüb.
S.Əlizadə həmin narkotik vasitəni və həbləri 1 000 manat qarşılığında Bakıda ona deyilən əraziyə çatdırmaq üçün sosial şəbəkədə tanış olduğu “Həbib”adlı İran vətəndaşı ilə razılaşdığını bildirib. Onun barəsində cinayət işi başlanılıb.
Bundan başqa, keçirilən digər əməliyyatlar nəticəsində narkotik tərkibli bitkilər əkib-becərməkdə şübhəli bilinən şəhər sakini Müşviq Mahmudov, narkotik vasitələrin qanunsuz dövriyyəsi ilə məşğul olan Coşqun Kərimov və Elbrus Abdullayev saxlanılıblar.
M.Mahmudovun evinin həyətyanı sahəsindən çəkisi 3 kiloqramdan artıq çətənə bitkiləri, digər iki nəfərdən isə müxtəlif növ narkotik vasitələr aşkarlanıb.
Digər əməliyyat zamanı həmkəndlisinin evindən 1 500 manat dəyərində samovarı oğurlayan rayonun Qaraman kənd sakini Fəxri Babayev də saxlanılıb. Oğurlanan məişət əşyası maddi sübut kimi götürülüb.
Faktlarla bağlı istintaq davam etdirilir.
