Sumqayıtda azyaşlı nəvəsini baxımsız şəraitdə saxlayan qadına cinayət işi açılıb.
Bu barədə 11 avqust tarixində İnsanoid-ə Daxili İşlər Nazirliyindən məlumat verilib.
Azyaşlının nənəsi Abdullayeva Ülviyyə Rəsul qızı barəsində “Qəsdən sağlamlığa yüngül zərər vurma” maddəsi ilə cinayət işi başlanılıb.
Hazırda istintaq hərəkətləri davam etdirilir.
***
14:47
Sumqayıtda baxımsız şəraitdə saxlanılan 2 yaşlı qız sığınacağa yerləşdirilib. Bu barədə 11 avqust tarixində Report Daxili İşlər Nazirliyinə istinadən xəbər verib.
Sosial şəbəkələrdə Sumqayıt şəhərində azyaşlının qeyri-insani rəftara məruz qalması ilə bağlı yayılan informasiyalar DİN tərəfindən nəzarətə götürülüb.
Sumqayıt şəhəri ərazisində yaşayan Ülviyyə Abdullayevanın himayəsində olan 2 yaşlı uşağı baxımsız şəraitdə saxlaması barədə Sumqayıt Şəhər Polis İdarəsinə məlumat daxil olub.
Ülviyyə Abdullayevanın himayəsində olan 3 azyaşlıdan biri - 2021-ci il təvəllüdlü qızın bədənində müxtəlif xəsarətlər aşkar edilib.
Azyaşlı himayəsində olduğu nənəsi ilə birlikdə Təcili Tibbi Yardım Şöbəsinə gətirilib.
İlkin müayinə zamanı azyaşlının fiziki və psixoloji cəhətdən öz yaşıdlarından geri qalması və sağ qulağında xəsarətlər aşkar edilib.
Azyaşlı tibbi yardım göstərilməsi və müvəqqəti olaraq qalması üçün sığınacağa yerləşdirilib.
Faktla bağlı araşdırma aparılır. Müvafiq ekspertizalar təyin edilib.
“Uşaqların anası bir müddət öncə dünyasını dəyişib”, - bununla bağlı paylaşım edərək Azərbaycan Uşaqlar Birliyinin sədri Kəmalə Ağazadə bildirib.
