Hindistanın Aviasiya Qəzalarının Araşdırılması Bürosu (AAIB), 12 iyun 2025-ci ildə Ahmadabadda baş vermiş təyyarə qəzası ilə bağlı ilkin araşdırma hesabatını açıqlayıb.
İnsanoid.com Xarici KİV-ə istinadən xəbər verir ki, sənəddə qəzanın texniki səbəbləri və hadisənin gedişatı ilə bağlı bir sıra yeni detallar yer alıb.
Hesabatda bildirilir ki, təyyarə yerə çırpıldıqdan sonra beş yaşayış binasına ziyan vurub, binalarda ağır konstruktiv dağıntılar və yanğın səbəbindən ciddi zərər qeydə alınıb.
Hesabatda qəza yerindən çəkilmiş şəkillər, qrafiklər və izahatlarla bərabər, hadisənin əsas mərhələlərinə dair təhlillər də yer alır.
Təyyarədə iki müasir uçuş qeydiyyat cihazı (EAFR) olub — biri təyyarənin quyruq, digəri isə ön hissəsində yerləşdirilib. Bu cihazlardan biri qəza yerinin yaxınlığında yerləşən binanın damında, zərbə və istilik izləri ilə, digəri isə yanmış vəziyyətdə, üzəri qurumla örtülmüş halda üç gün sonra tapılıb.
Bərpa edilmiş uçuş məlumatlarında 49 saatlıq uçuş qeydləri və qəzanın baş verdiyi uçuş da daxil olmaqla altı uçuşun detalları əks olunub. Qeydiyyat cihazlarından birində iki saatlıq kabin səs yazısı da mövcuddur və qəza anını əhatə edir.
Hesabatda təsdiqlənir ki:
* Təyyarənin uçuş çəkisi normaya uyğun olub.
* Təhlükəli yük daşınmayıb.
* Təyyarə 333 km/saat (180 düyün) sürətə çatdıqdan sonra hər iki mühərrikə yanacaq verilişi dayanıb, nəticədə mühərriklərin dövriyyəsi enib.
Kabin yazısında pilotlardan birinin “Niyə yanacağı dayandırdın?” sualına, digər pilotun “Mən etməmişəm” cavabı verdiyi eşidilir.
Qəzanın səbəblərinə dair araşdırma hələ də davam edir. AAIB və federal orqanlar qəzanın tam mənzərəsini müəyyənləşdirmək üçün işi davam etdirirlər.
