Goranboyda Muncuqlutəpə nekropolu tapılıb. Bu barədə İnsanoid APA-ya istinadən bu gün, 9 oktyabr tarixində xəbər verir.
Rayonun Tatarlı kəndi ərazisində insan sümükləri, saxsı qablar və metal əşyalar aşkar edilib. Aşkar edilənlərin eramızdan əvvəl təxminən 8-7-ci əsrlərə aid olduğu güman edilir. Qazıntı işləri təxminən bir hektar ərazini əhatə edən nekropolun hələ ki, iki yüz kvadratlıq sahəsində aparılıb.
Qəbirlərdən çoxlu sayda muncuq aşkarlandığından nekropola Muncuqlutəpə adı verilib.
Qazıntı aparılan ərazi çay yatağından bir qədər aralıda yerləşir. Yaxınlıqda Qalaboynu qədim yaşayış yeri, Gölyeri eneolit və erkən tunc dövrü yaşayış yeri var və çoxsaylı kurqanlarla əhatə olunub. Ərazi qədimdə sıx məskunlaşılıb, konkret bu nekropola gəldikdə, burada dəfn olunanların Qalaboynu yaşayış yerinin sakinləri olduğu ehtimal olunur. Aşkarlanan qəbirlərdə insan skeletləri ilə yanaşı, məişət əşyalarına da rast gəlinir. Kənd ərazisində son tunc erkən dəmir dövrünə aid 30-a qədər qəbir aşkarlanıb.
AMEA Arxeologiya, Etnoqrafiya və Antropologiya İnstitutunun aparıcı elmi işçisi, tarix üzrə fəlsəfə doktoru dosent Müzəffər Hüseynov bildirib ki, Muncuqlutəpə nekropolu 2007-ci ildə qeydə alınıb:
“Qəbirlərdə zoomorf tipli qablar, kişi qəbirlərində silahlar, qadın qəbirlərində bəzək əşyaları üstünlük təşkil edir. Bəzək əşyaları əqiqdən, sedalitdən, tuncdan hazırlanıb, bəzi bəzək əşyaları var ki, onlar assuriya tiplidir, yəni gətirilmədir, ümumiyyətlə buradan bir neçə assuriya tipli qablar da aşkar olunub. Nəlbəki formalı vaza tipli qablar isə eradan əvvəl 8-7-ci əsrlərdə bu ərazinin tayfaları ilə ön Asiyanın tayfaları arasında mədəni iqtisadi əlaqələri göstərir. Goranboy rayonu ərazisində 28 dövlət qeydiyyatında olan, 40 yeni aşkar olunmuş abidə var. Son dövrlərdə rayonun Qaraçinar kəndində arxeoloji qazıntı işləri aparılıb. Rayonun ərazisində aparılan qazıntı işlərində Azərbaycan arxeoloqları ilə bərabər, xarici arxeoloqlar da iştirak ediblər. Bunların içərisində İtaliya və Fransa arxeoloqları da olub. Oradan aşkar edilən maddi-mədəniyyət nümunələri laborator şəraitdə tədqiq olunacaq və müəyyən nümunələr xarici ölkələrə göndəriləcək”.
