Gürcüstanda azərbaycanlıların kompakt yaşadığı Saqareco rayonunun Ləmbəli kəndində 14 yaşlı “həyat yoldaşı” Aytac Şahmarovanı qətlə yetirməkdə şübhəli bilinən 27 yaşlı Alim Sadiqov 3 günlük axtarışlardan sonra saxlanılıb.
Bu barədə Insanoid bu gün, 10 oktyabr tarixində Gürcüstanın Daxili İşlər Nazirliyinə istinadən məlumat yayıb.
Polis cinayətdə istifadə edilmiş silahı dəlil kimi müsadirə edib.
Aytac Şahmarovanın anası bildirib ki, qızı 2 ay əvvəl Alim Sadiqov tərəfindən “evlənmək” məqsədilə qaçırılıb. Yerli KİV-nin məlumatına görə, azyaşlı bu müddət ərzində bir neçə dəfə qaçmağa da çalışıb, hətta bir dəfə qaçmağa müvəffəq olub. Lakin ailələrin bir araya gəlməsindən sonra Aytac Şahmarova “ər evi”nə qaytarılıb.
Cinayəti törətməsi sübuta yetirilərsə, şübhəlini 20 ilədək həbs cəzası gözləyir.
Hadisənin oktyabrın 5-də gecə saatlarında, “cütlüyün” qohumlardan birinin toyuna hazırlaşdığı ərəfədə baş verdiyi bildirilir.
Yerli sakinlərin sözlərinə görə, A. Sadiqov qeyri-rəsmi nikahda olduğu Aytac Şahmarovaya odlu silahdan 3 dəfə atəş açaraq xəsarət yetirib, yeniyetmə aldığı güllə yarasından hadisə yerindəcə keçinib.
