Hindistanın “IndiGo Airlines" şirkəti Dehli-Bakı-Dehli istiqamətində ilk dəfə avqustun 11-dən uçuşlara başlayıb. Bu barədə İnsanoid 12 avqust tarixində Report-a istinadən məlumat verir.
Aviaşirkət həftənin bazar ertəsi, çərşənbə axşamı, cümə axşamı və şənbə günləri olmaqla Bakı ilə Dehli arasında 4 reys həyata keçirəcək.
Əks-istiqamətdə uçuşlar isə bazar ertəsi, çərşənbə, cümə və bazar günləri reallaşdırılacaq.
Bakı “IndiGo” şirkətinin uçuş həyata keçirdiyi 30-cu istiqamətdir.
Bu ilin I yarısında Hindistandan Azərbaycana 47 670 nəfərdən çox şəxs səfər edib. Bu 2022-ci ilin eyni dövrü ilə müqayisədə 3 dəfədən çox, 2019-cu ilin eyni dövrü ilə müqayisədə isə 1,7 dəfə artım deməkdir.
Hindistan vətəndaşlarına Azərbaycana səyahət üçün sadələşdirilmiş "e-visa" sistemi tətbiq olunur. Bu vaxta qədər onlar ölkəmizə "Azərbaycan Hava Yolları" QSC-nin (AZAL) Bakı - Dehli - Bakı istiqamətində həyata keçirdiyi birbaşa uçuşlar vasitəsilə gələ bilirdilər.
Koronavirus (COVID-19) pandemiyası ilə əlaqədar olaraq uçuşlar müvəqqəti olaraq dayandırılmışdı. Ötən ilin avqust ayından Azərbaycan aviadaşıyıcısı Bakıdan Dehliyə və əks-istiqamətdə uçuşları bərpa edib.
AZAL Bakıdan Dehliyə həftənin bazar ertəsi, çərşənbə və şənbə günləri, əks-istiqamətdə isə çərşənbə axşamı, cümə axşamı və bazar günləri olmaqla həftədə 3 reys həyata keçirir.
