Azərbaycan Prezidenti İlham Əliyev və Suriyanın keçid dövrü üzrə Prezidenti Əhməd Əş-Şəraa arasında keçirilən geniştərkibli görüşdə iki ölkə arasındakı münasibətlərin inkişafı və əvvəlki rejimin yaratdığı zərərlər açıq şəkildə müzakirə olunub.
Prezident İlham Əliyev qeyd edib ki, Suriyada illər boyu Azərbaycana qarşı dost olmayan siyasət yürüdülüb, bu isə iki ölkə arasında durğunluğa səbəb olub. O vurğulayıb ki, Suriyada yeni rəhbərliyin formalaşması ilə əlaqələrin inkişafı üçün geniş imkanlar açılıb.
Əhməd Əş-Şəraa da öz növbəsində əvvəlki hökumətin yalnız Azərbaycanla deyil, bir çox ölkə ilə münasibətləri pozduğunu təəssüflə qeyd edib. O, Suriyanın Azərbaycanla siyasi, iqtisadi, mədəni və humanitar sahələrdə əməkdaşlıqda maraqlı olduğunu bildirib.
Əş-Şəraa, Azərbaycanın torpaqlarını işğaldan azad etməsi və inkişaf uğurlarına görə təbriklərini çatdıraraq, Azərbaycanın 90-cı illərdəki çətinlikləri ləyaqətlə dəf etdiyini vurğulayıb.
Görüşdə enerji sahəsində əməkdaşlığın əhəmiyyəti xüsusi qeyd olunub. Bildirilib ki, Suriya hazırda ağır enerji böhranı ilə üz-üzədir və yaxın zamanda Azərbaycan qazının Türkiyə üzərindən Suriyaya ixracı layihəsi həyata keçiriləcək. Azərbaycan bu sahədə Suriyanın enerji təhlükəsizliyinə və infrastrukturunun bərpasına ciddi töhfə verə bilər.
Görüşdə həmçinin humanitar, təhsil və mədəni sahələrdə əməkdaşlıq, o cümlədən suriyalı tələbələrə təqaüdlər, mədəni irsin bərpası, və Azərbaycanın işğaldan azad olunmuş ərazilərdəki bərpa təcrübəsinin Suriya ilə bölüşülməsi məsələləri də müzakirə olunub.
Bu görüş, yeni mərhələyə qədəm qoyan Azərbaycan–Suriya münasibətlərinin real əməkdaşlıq zəminində inkişaf etməsi üçün mühüm siqnal kimi qiymətləndirilir.
