Hindistanda Hərbi Hava Qüvvələrinin yüksək rütbəli zabiti hərbi sirləri intim fotolar müqabilində xarici kəşfiyyata ötürməkdə şübhəli bilinərək həbs olunub.
Polis araşdırmasına əsasən, Wing Commander rütbəli zabit məxfi hərbi məlumatları, o cümlədən döyüş təyyarələrinin yerləşdirilməsi, pilotsuz uçuş aparatlarının imkanları, hərbi əməliyyat planları və təlimlərlə bağlı məlumatları qarşı tərəfə ötürüb.
İddialara görə, zabit ötürdüyü məxfi sənədlərin hər səhifəsi müqabilində intim fotolar alıb. Araşdırma zamanı onun digər beş hərbçinin telefonlarına casus proqramı quraşdırılmasına da kömək etdiyi müəyyən edilib.
İstintaq materiallarında zabitin WhatsApp yazışmalarında 3008 mesaj, 65 foto və 42 səsli zəng qeydə alındığı bildirilir.
İş üzrə ittiham aktı məhkəməyə təqdim edilib. Bununla belə, zabitin təqsiri hələ məhkəmə tərəfindən təsdiqlənməyib.