Cəzaçəkmə müəssisəsində tanış olan üç nəfər keçmiş məhkum Oğuz rayonunda oğurluq edib. Bu barədə 28 oktyabr tarixində Daxili İşlər Nazirliyi İnsanoid-ə məlumat verib.
Belə ki, rayonun Bucaq kəndi ərazisində yerləşən evlərin birindən televizor, mağazadan tütün məmulatları və pul oğurlanıb, eləcə də bir ünvandan oğurluğa cəhd olunub. Daha sonra kənd sakininə məxsus “Mercedes” markalı avtomobil qaçırılıb.
Şübhəli bilinən üç nəfər, əvvəllər də dəfələrlə eyni əmələ görə məhkum olunmuşlar - Elbrus Həsənov, Araz Hüseynov və Hümmət Məmmədov saxlanılıblar.
Araşdırma zamanı məlum olub ki, oğurluq məqsədilə Bakı şəhərindən Oğuza gələn dostlar burada niyyətlərini həyata keçirdikdən sonra “Mercedes” markalı avtomobili qaçıraraq Bakı şəhərinə gediblər.
Saxlanılan şəxslər müxtəlif cinayətlər etdikləri üçün əvvəllər məhkum ediliblər və cəzaçəkmə müəssisəsində tanış olublar. Azadlığa çıxandan sonra isə yenidən birlikdə oğurluqlar ediblər.
Faktla bağlı cinayət işi başlanılıb.
