Hazırda Azərbaycanda avtomobillərin icarəyə verilməsi geniş yayılıb. Bəs icarəyə götürülmüş avtomobil qəzaya uğrayarsa və ya avtomobildə texniki nasazlıq yaranarsa, məsuliyyəti kim daşıyır? Məsələ ilə bağlı 13 dekabr tarixində Report araşdırma aparıb.
Nəqliyyat məsələləri üzrə mütəxəssis Eldəniz Cəfərov bilirib ki, kirayə zamanı ortaya çıxan nasazlıqlar avtomobil sahibi ilə icarədar arasında imzalanan müqavilə ilə tənzimlənməlidir: “Müqavilədə avtomobil qəzaya uğradıqda və yaxud xarab olduqda kimin və hansı formada məsuliyyət daşıması qeyd edilməlidir”.
Ekspertin sözlərinə görə, avtomobil icarəyə tam saz vəziyyətdə verilməlidir və bu müqavilədə öz əksini tapmalıdır. Lakin avtomobildə icarəyə götürənin idarə etdiyi müddətdə problem yaranarsa və ortada müqavilə olmazsa, bu zaman həmin dövrdə avtomobil kimin idarəçiliyindədirsə, məsuliyyəti də o daşıyır.
O, icarəyə verilən avomobillərin sığorta məsələsinə də toxunub: “Kirayə avtomobil götürən şəxs mütləq avtomobilin icbari sığortasını tələb etməlidir. Qanuna əsasən, həcmi 50 kub santimetrdən yuxarı bütün nəqliyyat vasitələrinin icbari sığortası olmalıdır. Eyni zamanda bəzi kirayə şirkətləri avtomobillərin kasko sığortasını da edirlər ki, bu da yaxşı haldır”.
