“Heydər Əliyev Sovet İttifaqının ən nüfuzlu siyasətçilərindən biri olub”. Bunu Rusiya Federasiyası Xarici İşlər Nazirliyinin (XİN) informasiya və mətbuat departamentinin direktoru Mariya Zaxarova bildirib.
Bu barədə 3 may tarixində İnsanoid Moscow-baku.ru-ya istinadən məlumat verir.
“Bu il SSRİ-nin və Azərbaycanın görkəmli xadimi Heydər Əliyevin anadan olmasının 100 illiyi tamam olur. Onun adı ölkəmizdə daim hörmətlə qarşılanır. Heydər Əliyev mübaliğəsiz Sovet İttifaqının nüfuzlu siyasətçilərindən biri idi. Sovet dövlətində ən yüksək və məsul vəzifələrdə şəxsi, işgüzar, peşəkar keyfiyyətləri sayəsində ölkə qarşısında duran mürəkkəb vəzifələri həll etdi. Mən çox sayda nümunədən yalnız bir misal çəkəcəyəm - Heydər Əliyevin Baykal-Amur magistral xəttinin tikintisinə verdiyi böyük töhfə.
Heydər Əliyev Qafqazda vəziyyətin ümumi sabitləşməsində də əsas rollardan birini oynadı. Azərbaycanla Rusiya arasında dostluq münasibətlərinin inkişafı onun üçün prioritet məsələ idi. O, xalqlarımız arasında çoxəsrlik dostluq əlaqələrinə uyğun olaraq, Azərbaycanda rus dilinin və mədəniyyətimizin mövqelərinin - bir çox cəhətdən ortaq mədəniyyətimizin qorunub saxlanmasına və möhkəmlənməsinə öz töhfəsini verib. Onun şəxsi səyləri sayəsində bu gün oğlu İlham Əliyev tərəfindən möhkəmləndirilməkdə olan Rusiya-Azərbaycan münasibətlərinin və müttəfiqlik əməkdaşlığının hazırkı yüksək səviyyəsinin əsasları qoyuldu.
Bu il ölkəmizdə Heydər Əliyevin anadan olmasının 100 illiyinə həsr olunmuş bir sıra anım tədbirləri keçirilir. Rusiya Federasiyasının bir sıra subyektlərində - Tatarıstan Respublikasında, Həştərxan vilayətində və Moskvada onun xidmətlərinin xatirəsinin əbədiləşdirilməsi və Sovet İttifaqının inkişafına, Rusiya-Azərbaycan əlaqələrinin möhkəmləndirilməsinə dair təşəbbüslər həyata keçirilib”, - deyə Mariya Zaxarova bildirib.
Qeyd edək ki, 2023-cü il Azərbaycanda Heydər Əliyev İli elan edilib.
