Noyabrın 14-də Bakıda dünyaşöhrətli yapon animatoru Hayao Miyazakinin əsərlərinə həsr olunan "Miyazaki kainatı axşamı" adlı multimedia konserti keçiriləcək.
İnsanoid.com xəbər verir ki, tarixi Kamera və Orqan Musiqisi Zalında (Kirxa) təşkil olunacaq tədbirdə Miyazakinin məşhur animasiya filmlərinin musiqiləri canlı ifa ediləcək, həmin əsərlərdən kadrlar isə böyük ekranda nümayiş etdiriləcək.
Konsertin əsas özəlliyi musiqi, vizual təsvirlər və yüzlərlə şamın işığının birləşdirilərək tamaşaçılar üçün xüsusi atmosfer yaratmasıdır.
Proqramda yapon bəstəkarı Co Hisaişinin Miyazaki filmləri üçün yazdığı məşhur melodiyalar səslənəcək. Bunlar arasında "Spirited Away", "Howl"s Moving Castle", "My Neighbor Totoro" və "Nausicaä of the Valley of the Wind" animasiyalarının musiqiləri yer alır.
Tamaşaçılar böyük ekranda sevimli personajlarını izləyərkən filmlərin tanış melodiyalarını canlı instrumental ifada dinləyə biləcəklər. Təşkilatçıların fikrincə, görüntü və musiqinin vəhdəti izləyicilərə özlərini Miyazakinin fantastik dünyasının bir hissəsi kimi hiss etməyə imkan verəcək.
Konsertdə Azərbaycanın tanınmış musiqiçilərindən ibarət "Ars Caspia Ensemble" çıxış edəcək. Ansamblın heyətində skripkaçılar Renata Abubekirova və Nərgiz Hüseynzadə, Əməkdar artistlər Aleksey Miltıx (violonçel) və Rəna Rəhimova (alt), kontrabas ifaçısı Rəvan Əhmədzadə və pianoçu Ülviyyə Dadaşova yer alırlar.
Tədbirin təşkilatçısı 2023-cü ildən Bakıda şam işığında instrumental konsertlər, video instalyasiyalar və multimedia proqramları təqdim edən "Ars Caspia Concerts" layihəsidir.
Konsert noyabrın 14-də iki seansda – saat 18:00 və 20:00-da keçiriləcək. Hər seans bir saat davam edəcək.
Biletlərin qiyməti 15–50 manat arasında dəyişir. Onları iTicket.az platformasından onlayn və şəhərdəki bilet kassalarından almaq mümkündür. Elektron QR-biletlər tədbir günü aktivləşdiriləcək.
Konsert üçün yaş məhdudiyyəti 6+ olaraq müəyyən edilib.
Məkan: Kamera və Orqan Musiqisi Zalı (Kirxa), Bakı şəhəri, 28 May küçəsi, 41.
