Novruz süfrəsini açmaq bir ailəyə neçəyə başa gəlir? İnsanoid mövcud qiymətlərlə maraqlanıb.
Bir ailə orta səviyyəli bayram süfrəsi açmaq üçün minimum 80-90 manat xərcləməlidir.
Bayram süfrəsinin əsas atributu olan paxlavanın 1 kiloqramı 10-30 manat, şəkərburanın 1 ədədi 1 manat, qoğalın ədədi isə 50 qəpikdən başlayır.
Əsas yeməklərdən plov və ləvəngi 35-38 manata başa gələcək. 1 kiloqram düyünün qiyməti 4-9 manat arasında dəyişir. Kərə yağlarının qiyməti isə 13-18 manat arasındadır. Mal ətinin kiloqramı 11-12 manata, quzu əti 14-15 manata satılır. Bayram süfrəsinə ən çox kütüm balığı qoyulduğundan onun qiyməti 15 manat, sudak 12-13 manat, xəşəm 15-18 manata satılır. Göl balıqlarının qiyməti isə 5-6 manatdan başlayır.
Bakıda təşkil olunan “Kənddən şəhərə” yarmarkalarında ləpə fındığın qiyməti 11-16, kişmiş 6-12 manat təşkil edir.
Süfrəyə qoyulan meyvələrə gəlincə, banan 2.5 manat, alma 1.5 manat, narıngi və portağal 2 manata satılır. İynə və innabın kiloqramı isə 5-6 manat arasında dəyişir. Səməninin qiymətləri isə 1 manatdan başlayır.
