Bu gün, 28 may tarixində Türkiyədə prezident seçkilərinin ikinci turu keçirilib. Rəcəb Tayyib Ərdoğan qarşıdakı 5 il ərzində ölkəyə rəhbərlik edəcək. Bu haqda İnsanoid.com məlumat verir.
“Haber Global”dan əldə olunan məlumata görə, hazırkı Prezident Ərdoğan 52,10 faiz, müxalif Cümhuriyyət Xalq Partiyasının sədri Kamal Kılıçdaroğlu isə 47,90 faiz səs toplayıblar.
Türkiyədə keçirilən ikinci tur prezident seçkilərində seçki qutularının açılması davam edərkən Prezident Rəcəb Tayyib Ərdoğanı ilk təbrik edən lider Azərbaycan Prezidenti İlham Əliyev olub.
Azərbaycan Respublikasının Prezidenti İlham Əliyev Prezident Rəcəb Tayyib Ərdoğana telefonla zəng edərək onu prezident seçkilərindəki qələbəsi münasibətilə təbrik edib.
Daha sonra Özbəkistanın Prezidenti Şavkat Mirziyoyev də Ərdoğana zəng edərək qələbə ilə təbrik edib.
Rəcəb Tayyib Ərdoğan xalqa müraciət ederək bu gün Türkiyə əsrinin qapısının açılmasını qeyd edib: “Qəlbi və gözü bizdə olan dostlarımızın ümidlərini birlikdə doğrultduq. Türk xalqı 28 mayda tarix yazdı. Qarşımızda 2024-cü il var. Həmin ildə İstanbulumuzu yenidən qazanmaq üçün çox çalışacağıq”.
Onun sözlərinə görə, bundan sonrakı əsas hədəf xalqın birliyinə sahib çıxmaqdır:
“Heç kim bu ölkənin qazanclarına göz tikə bilməz. Qardaş ölkə prezidentləri sevincimizi bizimlə bölüşürlər”.
Ankarada prezident iqamətgahı qarşısında vətəndaşlar Ərdoğanın qələbəsini qeyd edir və onun oraya gəlişini gözləyirlər. Türkiyə prezidenti İstanbulda tərəfdarları qarşısında çıxışı zamanı iqamətgaha gələcəyini açıqlayıb. Şənliklər ölkənin müxtəlif yerlərində keçirilir. Ölkə ərazisində təhlükəsizlik tədbirləri gücləndirilib.
[video width="848" height="464" mp4="https://insanoid.com/storage/thumbs/large/2023/05/31cde7cf8ee5447d6b0b9972da81c725.mp4"][/video]
