Abşeron Rayon Polis İdarəsi və tabeli polis bölmələri iyunun 23-də rayon ərazisində hüquqpozmalara qarşı gücləndirilmiş əməliyyat-profilaktiki tədbirlər keçirib. Bu barədə 24 iyun tarixində Daxili İşlər Nazirliyi İnsanoid-ə məlumat verib.
Hüquq pozuntularının profilaktikası - küçə ticarəti, avaralıq və dilənçilik, antisanitariya, avtomobil yollarında hərəkətin təhlükəsizliyi, xüsusilə müəyyən olunmayan yerlərdə, səkilərdə, piyada keçidlərində avtomobillərin saxlanılması və digər neqativ hallarla bağlı iş aparılıb.
Tədbirlərlə müxtəlif növ cinayət törətdiklərinə görə axtarışda olan 4 nəfərin yeri müəyyənləşdirilərək saxlanılıb, “isti izlər”lə cinayətin açılması ilə bağlı 6, narkotiklə əlaqəli cinayətlərə görə 5, küçə ticarəti ilə məşğul olduqlarına görə 26, avaralıq və dilənçiliklə məşğul olduqlarına görə 7, xırda xuliqanlığa görə 3, xırda talamaya görə 81, antisanitariya və digər inzibati xəta tərkibi yaradan hallarla bağlı isə 577 fakt aşkarlanıb, mülki axtarışa görə 3 nəfər tapılaraq aidiyyəti üzrə təhvil verilib.
Həmçinin yol hərəkəti qaydalarını pozan ümumilikdə 147 sürücü məsuliyyətə cəlb edilib. İnzibati xətalarla bağlı protokollar tərtib olunub, avtomobilinə qanunla qadağan olunan əlavə avadanlıqlar quraşdıran, eləcə də konstruksiyasında dəyişiklik edən 12 sürücü, dayanma-durma qaydalarının pozulmasına görə 114 fakt müəyyən edilib.
