Növbəti ilin yanvarın 15-dən Qarabağa müntəzəm avtobus reyslərinin açılması planlaşdırılır. Bu barədə 14 dekabr tarixində Azərbaycan Yerüstü Nəqliyyat Agentliyinə istinadən Report xəbər verib.
Məlumata görə, reyslər Bakı şəhərindən, Füzuli rayonunun Əhmədbəyli kəndindən və Füzuli Beynəlxalq Hava Limanından Şuşa şəhərinə, eləcə də Bakıdan Ağdam şəhərinə marşrut xətləri ilə yaradılacaq.
Daşıyıcıların seçilməsi üçün müsabiqə elan edilib. Müsabiqədə iştirak haqqı 50 manatdır. İddiaçılar dekabrın 27-nə qədər ərizə ilə quruma müraciət etməli, yanvarın 6-na qədər isə əsas sənədləri təqdim etməlidirlər.
"Daşıyıcılar seçilərkən rahat, ekoloji cəhətdən təmiz avtobusları olanlara üstünlük veriləcək. İlkin mərhələdə Qarabağa reyslər həftədə 2 dəfə olacaq. Əgər daşımalar rentabelli olarsa, reyslərin sayı artırıla bilər", - AYNA-dan bildirilib.
