Uşaq bağçasında baş vermiş külli miqdarda mənimsəmə faktı ilə bağlı cinayət işi başlanıb. Bu barədə 21 iyun tarixində APA Şəki Rayon Prokurorluğuna istinadən məlumat yayıb.
Məlumata görə, Şəki şəhər 16 saylı Uşaq Bağçasında yol verilən qanunsuzluqlarla bağlı daxil olmuş vətəndaş müraciəti əsasında Rayon Prokurorluğunda araşdırma aparılıb.
Araşdırma zamanı həmin uşaq bağçasının direktoru tərəfindən 2019-2023-cü illər ərzində öz qulluq mövqeyindən istifadə edilməklə ona etibar edilmiş 105 min manat məbləğində pul vəsaitinin müxtəlif yollarla mənimsənilməsinə əsaslı şübhələr müəyyən edilib.
Faktla bağlı Şəki Rayon Prokurorluğunda “külli miqdarda mənimsəmə” və “vəzifə səlahiyyətlərindən sui-istifadə” maddələri ilə cinayət işi başlanaraq istintaq aparılır.
