Sosial şəbəkələrdə vətəndaşları “kreditə pul verilir” adı altında kiber üsullarla talayan dəstə üzvləri saxlanılıblar. Bu barədə 2 avqust tarixində İnsanoid-ə Daxili İşlər Nazirliyindən məlumat verilib.
Talama əməllərində şübhəli bilinən şəxslərin feyk səhifə və profillərində talamaya məruz qalanların dairəsi müəyyən edilməklə şəbəkələşmiş qrupun bütün qanunsuz fəaliyyəti aşkar edilib.
Qrup üzvləri “Komissiya”, “bank xərcləri” adı ilə aldatdıqları vətəndaşlardan onlayn köçürmə ilə müxtəlif məbləğlərdə pul vəsaitləri ələ keçiriblər. Onlar izi itirmək üçün pul köçürən şəxslərin hesablarını bloklayıblar və həmin vəsaiti şəxsi hesablara köçürərək nağdlaşdırıblar.
Yerləri müəyyən edilən şəbəkə üzvləri - paytaxt sakini, əvvəllər məhkum olunan 30 yaşlı Kənan Əmrahlı, 20 yaşlı Raqif Məmmədov, 29 yaşlı Zahir Xalidoğlu və 28 yaşlı Emin İsmayılov Bakı şəhərində saxlanılıblar.
Dəstə üzvləri onlarla şəxsə maddi ziyan vurduqlarını etiraf ediblər.
Hazırda onların barələrində araşdırmalar davam etdirilir.
Dəstə üzvlərinin qanunsuz əməllərindən zərər çəkən başqa vətəndaşlar varsa, “102” Xidməti Zəng Mərkəzinə və Nazirliyin sosial şəbəkələrdəki rəsmi səhifələrinə məlumat verə bilərlər.
[gallery link="file" columns="4" size="full" ids="124175,124174,124173,124172"]
