Sumqayıtda batareya udan körpə dünyasını dəyişib. Bu barədə 17 oktyabr tarixndə APA Sumqayıt Tibb Mərkəzinə istinadən məlumat verib.
Belə ki, 28.03.2022-ci il təvəllüdlü Qədirli Məryəm Qafur qızı 16.10.2023-cü il tarixində TƏBİB-nin tabeliyindəki Sumqayıt Tibb Mərkəzinin Uşaq Xəstəxanasına ağır vəziyyətdə, süni tənəffüs aparatına qoşulu özəl tibb müəssisəsinin təcili yardım briqadası tərəfindən gətirilib və birbaşa reanimasiya şöbəsinə yerləşdirilib.
"Valideynin verdiyi anamnezə əsasən, uşaq bir həftədən çoxdur xəstə olub. 16.10.2023- cü il tarixdə Uşaq Xəstəxanasının Poliklinika şöbəsinə öskürək, hərarət, halsızlıq, qusma, yeməkdən imtina şikayətləri ilə pediatra müraciət edilib. Müayinələr nəticəsində uşağın qida borusunda yad cisim olduğu aşkarlanıb. Uşaq Sumqayıtda yerləşən özəl klinikaların birinə göndərilib. Yad cisim çıxarıldıqdan sonra uşaq valideynləri tərəfindən evə aparılıb.
Valideynin dediyinə görə, axşam uşağın vəziyyəti qəflətən pisləşib. Valideyn uşağı yaxında yerləşən özəl klinikaya çatdırıb. Klinikada uşağın vəziyyəti tənəffüs ürək dayanması kimi qiymətləndirilərək, ilkin yardım göstərilib və süni tənəffüs aparatına qoşularaq Uşaq Xəstəxanasına çatdırılıb. 17.10.2023 saat 06:40-da xəstədə təkrar ürək dayanması baş verib. Aparılan reanimasion tədbirlərə baxmayaraq, bu gün saat 07:10 radələrində bioloji ölüm baş verib", - mərkəzdən bildirilib.
