Şuşa şəhərində növbəti kütləvi məzarlıq aşkarlanıb. Bu barədə İnsanoid 15 avqust tarixində Report-a istinadən məlumat verir.
Avqustun 1-15-dək aparılan qazıntı işləri nəticəsində Şuşa türməsi ərazisində 17 şəxsə aid olduğu ehtimal edilən insan qalıqları aşkar edilib.
Hazırda Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının və müvafiq qurumların əməkdaşları kütləvi məzarlığın aşkarlandığı ərazidədirlər.
“Şuşada aşkarlanan meyit qalıqlarının 6-sının qarın nahiyəsində nal mismarları tapılıb”. Bunu Komissiyanın əməkdaşı Zaur İsmayılov deyib.
Onun sözlərinə görə, bu, onlara mismarların məcburən uddurulmasına dəlalət edir:
“Həmçinin kəsici-deşici alətlərlə küt travmaların yetirilməsi, güllələnməsi, ətraf əzalarının kəsilməsi kimi hallar da aşkarlanıb”.
Bundan əvvəl iyun ayında Şuşa şəhərində Şuşa türməsinin ərazisində kütləvi məzarlıq aşkar edilib.
İndiyədək kütləvi məzarlıqlar Ağdam rayonunun işğaldan azad olunan Sarıcalı kəndi ərazisində, Şuşa rayonunun Daşaltı kəndində, Xocavənd rayonunun Edilli kəndində, Xocalı rayonunun Fərrux kəndində, Füzuli rayonunun Yuxarı Seyidəhmədli kəndində, Kəlbəcərdə, Ağdamda və digər yaşayış məntəqələrində aşkarlanıb.
[gallery link="file" size="full" ids="125722,125723,125721"]
