12 iyul 2020-ci ildə Ermənistan silahlı qüvvələri Azərbaycanın Tovuz rayonu istiqamətində atəşkəsi pozaraq Azərbaycan Ordusunun mövqelərini və yaşayış məntəqələrini atəşə tutub. Nəticədə bir neçə gün davam edən və hərb tariximizdə “Tovuz döyüşləri” kimi yer alan döyüşlər başlayıb.
Döyüşlər zamanı Azərbaycan Ordusu Ermənistan silahlı qüvvələrinin dayaq məntəqəsini, artilleriya qurğularını, hərbi hissələrinin ərazisində avtomobil texnikasını və canlı qüvvəsini məhv edib. Ermənistan silahlı bölmələrinin hərbçiləri səngərləri qoyub qaçırdı. Həmçinin Ermənistan cəbhədəki uğursuzluğunu gizlədir, hərbi rəhbərliyin yalan məlumatlarını yayırdı.
Tovuz döyüşləri zamanı general-mayor Polad Həşimov, polkovnik İlqar Mirzəyev, mayor Namiq Əhmədov, mayor Anar Novruzov, baş leytenant Rəşad Mahmudov, gizir İlqar Zeynalov, gizir Yaşar Babayev, baş çavuş Vüqar Sadıqov, çavuş Elçin Mustafazadə, çavuş Nazim İsmayılov, baş əsgər Elşad Məmmədov və əsgər Xəyyam Daşdəmirov şəhidlik zirvəsinə ucalıblar.
Xüsusi qəhrəmanlıq göstərdiklərinə görə general-mayor Polad Həşimov və polkovnik İlqar Mirzəyev Azərbaycanın Milli Qəhrəmanı adına layiq görülüblər.
Həmçinin Ermənistanın hücumları nəticəsində Tovuz rayonunun Ağdam, Vahidli, Dondar Quşçu, Aşağı Öysüzlü, Yuxarı Öysüzlü və Əlibəyli kəndlərinə ciddi ziyan dəyib. Həmçinin Ağdam kənd sakini, 76 yaşlı Əziz Əzizov da qətlə yetirilib.
Tovuz döyüşləri Azərbaycan Ordusunun qələbəsi ilə yekunlaşdı və bunu qeyd etmək üçün minlərlə insan küçələrə çıxdı, dövlətə, orduya dəstək göstərdilər.
