Xaçmaz rayonunun Xudat şəhəri Kəndxudat kəndinin 40 yaşlı sakini 5 gün Xudat Polis Bölməsində qeyri-qanuni saxlanıldıqdan sonra azadlığa buraxılıb. Bu barədə İnsanoid 12 avqust tarixində ShimalNews-ə istinadən məlumat verir.
Belə ki, avqustun 5-i saat 18:00 radələrində kənd sakini evdən çıxaraq Xudat şəhərinə gedib və geri qayıtmayıb. Məsələ ilə bağlı onun yaxınları polisə və təcili tibbi yardıma müraciət ediblər, lakin heç bir məlumat əldə edə bilməyiblər.
Bir neçə gün sonra onlar itkin düşən haqqında ərizə yazmaq üçün Xudat Polis Bölməsinə müraciət ediblər. Orada məlum olub ki, Xudat sakinini protokolsuz və ya hər hansı bir qeydiyyat olmadan bölmənin iclas zalında saxlayırlar. Səbəbini öyrənmək istəyəndə isə heç bir izahat verilmədən, nə vaxt lazım bilinsə, buraxılacağı deyilib.
Bundan sonra Daxili İşlər Nazirliyinin “102 zəng xidməti”nə hadisə ilə bağlı məlumat verilib və Azərbaycan Respublikası Baş Prokurorluğuna, Daxili İşlər Nazirliyinə, Xaçmaz Rayon Prokurorluğuna, Xaçmaz Rayon Polis Şöbəsinə şikayət ərizəsi göndərilib. Yalnız bundan sonra, avqustun 10-u axşam saatlarında saxlanılan şəxs sərbəst buraxılıb.
“Məlum olub ki, Xudat sakini tanıdığı digər adam haqqında şahid qismində yalan ifadə vermək üçün saxlanılıbmış. O, 5 gün ərzində ac və yuxusuz qalıb. Azadlığa buraxılmadan öncə isə Xaçmaz Rayon Məhkəməsinə aparılaraq geri tarixlə ictimai qaydaları pozmasına görə ona tənbeh sənədləşdirilib”, - məlumatda bildirilib.
