Azərbaycan Silahlı Qüvvələrinin ilk Hərbi Andı 8 dekabr 1991-ci ildə qəbul edilib.
Hərbi Andın mətnini polkovnik Zadir Rzayev, qərargah rəisi mayor Nurəddin Abdullayev və müdafiə nazirinin müavini Dadaş Rzayev hazırlayıb.
30 il əvvəl bu gün "Birinci tabor" adlanan könüllülərdən ibarət ilk hərbi hissə Şəhidlər Xiyabanında Hərbi Andı qəbul edib.
Hərbi And:
Təntənəli surətdə and içirəm!
Azərbaycan Respublikasının mənafeyini, onun suverenliyini, ərazi bütövlüyünü və müstəqilliyini şərəflə qoruyacaq, bundan ötrü qanımı və canımı əsirgəməyəcəyəm.
Səmimi, cəsur, intizamlı olacaq, hərbi sirri verməyəcək, hərbi nizamnamələrin tələblərini yerinə yetirəcək, komandirlərin və rəislərin əmrlərinə sözsüz tabe olacağam.
Hərb işini vicdanla öyrənəcək, əcdadların hərbi ənənələrini şərəflə davam və inkişaf etdirəcək, hər an əldə silah Vətənin müdafiəsinə qalxmağa hazır olacağam.
Andımı pozsam, Azərbaycan Respublikası qanunlarının tam ciddiyyəti ilə məsuliyyət daşımağa hazıram.
