Türkiyənin İstanbul şəhərində keçirilən 9-cu Beynəlxalq İpəkyolu Film Mükafatları festivalında Azərbaycanın iki filmi mükafatlar qazanıb. Bu barədə dekabrın 7-də Mədəniyyət Nazirliyindən məlumat verilib.
Amil Amalın “Titrəmə” filmi festvalın beynəlxalq qısametrajlı bədii film kateqoriyasında “Ən yaxşı film” mükafatına, Lətif Lətifsoyun “Anya” filmi isə beynəlxalq qısametrajlı sənədli film kateqoriyasında “Münsiflər heyətinin xüsusi mükafatı”na layiq görülüb.
Festivalın mükafatlandırma mərasimi dekabrın 6-da baş tutub. Cari il mükafat üçün müxtəlif ölkələrdən 3089 müraciət qəbul olunub. Bu göstərici rekord hesab edilir.
