Son bir ildə Kliniki Tibbi Mərkəzdə vəziyyətləri ağır olan 260 hamilə qadından 20-nin həyatını xilas etmək mümkün olmayıb. Bu barədə yanvarın 11-də xəstəxanadan məlumat verilib.
Verilən məlumata görə, bu müddət ərzində Mərkəzə COVID-19-a yoluxmuş 903 hamilə və 36 zahı qadın yerləşdirilib. Hamilə olanlardan 39-da düşük baş verib. Dünyaya gələn uşaqlardan 7-si diri doğulsa da, ağciyər çatışmazlığı səbəbindən vəfat edib.
Bildirilib ki, COVID-19 tipli viruslara və ya qrip kimi digər tənəffüs yoluxucu infeksiyalara yoluxmuş hamilə qadınlarda xəstəliyin ağırlaşma riski daha yüksəkdir.
Qeyd edək ki, Səhiyyə Nazirliyi risk qrupuna daxil olan qadınlara hamiləliyin 12 həftəsindən sonra “Pfizer” vaksini ilə peyvənd olunmağı tövsiyə edir.
