Yeraltı və yerüstü sərvətlərlə zəngin olan Qarabağın turizm potensialı kifayət qədər genişdir. Burada turizmin bir çox növləri - dağ, qış, ov, sağlamlıq və ekoturizmin inkişafı üçün bütün imkanlar mövcuddur.
Prezidentin tapşırığına əsasən, işğaldan azad edilmiş ərazilərin turizm inkişaf strategiyası hazırlanıb. Gələcəkdə Füzuli-Xocavənd-Şuşa-Laçın, Füzuli-Cəbrayıl-Zəngilan, Zəngilan-Qubadlı-Kəlbəcər-Laçın, Bərdə-Ağdam istiqamətlərində turizm marşrutlarının təşkili nəzərdə tutulur.
Dövlət Turizm Agentliyindən verilən məlumata görə, ilk “Yolumuz Ağdamadır” devizi ilə marşrut təqdim olunacaq. Daha sonra “Yolumuz Qarabağadır” konsepsiyası ilə marşrutlar qurulacaq. Sovet dövründə Qarabağ marşrutu çox populyar idi. Şuşa tarixi, sağlamlıq və mədəni turizm mərkəzi kimi tanınırdı. Şuşada ilk istirahət evi 1936-cı ildə istifadəyə verilib.
Laçın və Kəlbəcəri həm tarixi-dini, həm də müalicəvi cəhətdən turizm istiqamətində inkişaf etdirmək mümkündür. Kəlbəcərin Yuxarı İstisu, Aşağı İstisu kimi çox böyük müalicəvi təsirə malik mineral su yataqları var. Ən qədim yaşayış məntəqələrindən biri olan Füzuli rayonu yaxınlığında yerləşən Azıx mağarası turistləri cəlb edə biləcək məkanlardandır.
Prezident oktyabrın 9-da Xocavəndə səfəri zamanı demişdir: “Tarixi abidələrlə zəngin olan bu yerlərdə turizm mərkəzləri, otellər tikmək üçün azərbaycanlı və xarici investorları dəvət etmək istəyirəm”.
