Dənizkənarı Bulvar İdarəsi tərəfindən Dənizkənarı Milli Parkda Yeni il şənlikləri ilə bağlı hazırlıq işləri yekunlaşdırılır. Bu haqda məlumatı Report bu gün, 23 dekabr tarixində verir.
Belə ki, 24 dekabrdan etibarən uşaqların istirahətini yüksək səviyyədə təmin etmək məqsədilə Milli Parkın “Köhnə bulvar” ərazisində əyləncəli-musiqili proqramlar təşkil olunacaq. Bu məqsədlə Dövlət Kukla Teatrının arxasındakı ərazi tam Yeni il ab-havasında bəzədilir, burada Yeni illə bağlı kompozisiyalar hazırlanır.
Bundan əlavə, nağıl qəhrəmanları, Şaxta baba və Qar qız, Santa Klaus, cizgi film qəhrəmanlarının obrazlarında animatorlar (Harri Potter, Malefisenta, “Ələddindən” Cəfər, Qrinç, Çəkməli pişik, Cek Sərçə, Panda, Sonik, “Alisa möcüzələr ölkəsindən” Dəli Dovşan, “Su pərisindən” Ursula) və eyni zamanda transformerlər (robotlar) uşaqları şənləndirərək böyük sevinclərinə səbəb olacaqlar.
Bununla yanaşı, uşaqların asudə vaxtının səmərəli keçirilməsi üçün diskoteka, tamaşalar, konsert, atəşfəşanlıq, illüminasiya (işıq) və alov şousu da təşkil olunacaqdır. Milli Parkı ziyarət edən uşaqların əyləncəsinə rəngarənglik qatmaq məqsədilə üzlərinin boyanması (face art) da nəzərdə tutulub.
Dənizkənarı Bulvar İdarəsi tərəfindən təşkil olunacaq Yeni il şənliyi 8 yanvar 2023-cü il tarixinə kimi davam edəcək.
