Bu gün, martın 17-də ali və orta ixtisas təhsili müəssisələrinə tələbə qəbulu ilə bağlı ərizələrin qəbulu başa çatır. Bu barədə Dövlət İmtahan Mərkəzindən (DİM) məlumat verilib.
Ərizə qəbulunda həm cari, həm də əvvəlki illərin məzunları iştirak edirlər. Saat 09:00-a olan məlumata əsasən, 90 810 abituriyent öz ərizəsini təsdiq edib.
Abituriyentlər “Şəxsi kabinet” yaratdıqdan sonra (şəxsi kabineti olmayanlar) istifadəçi adı və parolundan istifadə etməklə DİM-in müvafiq internet səhifəsinə daxil olub “Abituriyentin elektron ərizəsi” formasını doldurur və təsdiq edirlər.
Ərizənin təsdiqi iki üsulla həyata keçirilir:
- Abituriyentlər ərizələrini özləri təsdiq edə bilərlər;
- Ərizəsini Sənəd Qəbulu Komissiyasında (SQK) təsdiq etdirməli olan abituriyentlər tələb olunan sənədləri təqdim etməklə saat 17:00-dək elektron ərizələrini müvafiq SQK-larda təsdiq etdirirlər.
Qeyd edək ki, ərizə qəbuluna martın 4-də başlanılıb.
