"Nvidia" şirkətinin keçmiş rəhbəri, 63 yaşlı milyarder Censen Huangın şirkətin daha bir əməkdaşı ilə intim münasibətdə olduğu iddia edilir. Beləliklə, son günlər ərzində evli biznesmenin adı üç qadınla bağlı yayılan münasibət iddialarında hallanıb.
"Reuters" agentliyi vəziyyətlə tanış olan iki mənbəyə istinadən yazır ki, Huangın "Nvidia"nın daha bir əməkdaşı ilə münasibəti olub. Qadının kimliyi açıqlanmayıb. Jurnalistlər hələlik onunla əlaqə saxlaya bilməyiblər. Şirkət isə məsələ ilə bağlı şərh verməkdən imtina edib.
Xatırladaq ki, bundan əvvəl milyarderin daha iki qadınla münasibətdə olduğu barədə məlumatlar yayılmışdı. Onlardan biri amerikalı sahibkar Elis Huangdır. Onun Censen Huangla eyni soyadı daşımasına baxmayaraq, aralarında qohumluq əlaqəsi yoxdur. ABŞ xüsusi xidmət orqanları Elis Huangın Çin kəşfiyyatı ilə əlaqələrindən şübhələnir.
İstintaq versiyasına görə, onun rəhbərlik etdiyi Sinqapur şirkəti "Megaspeed" ixrac məhdudiyyətlərini aşaraq milyardlarla dollar dəyərində qabaqcıl "Nvidia" çipləri əldə edib. Elis Huangın isə məxfi məlumatları Çin tərəfinə ötürmüş ola biləcəyi iddia olunur.
Huangın adı hallanan digər qadın isə şirkətin səhiyyə istiqaməti üzrə vitse-prezidenti, 48 yaşlı Kimberli Pauelldir. Beş keçmiş əməkdaş onların münasibətdə olduğunu təsdiqləyib.
Elis Huangla bağlı məlumatların yayılmasından sonra milyarder həyat yoldaşına xəyanət etdiyini açıq şəkildə etiraf edib. O, əməkdaşlara göndərdiyi məktubda 40 ildən artıqdır evli olduğu həyat yoldaşı Loridən üzr istəyib və zamanla etimadı bərpa edə biləcəklərinə ümid etdiyini bildirib.
Mətbuatda yayılan iddialara görə, cütlük nikah müqaviləsi bağlamayıb. Bu səbəbdən mümkün boşanmanın milyarderə 81 milyard dollara başa gələ biləcəyi irəli sürülür.
Skandal fonunda Censen Huangın sərvətinin 7,4 milyard dollar azaldığı, "Forbes"un dünyanın ən varlı şəxsləri reytinqində səkkizinci yerdən 11-ci yerə düşdüyü bildirilir. Onun sərvəti 151,2 milyard dollar qiymətləndirilir. Eyni zamanda, mediada "Nvidia"nın bazar dəyərinin təxminən 470 milyard dollar azaldığı iddia olunur.
Məqalədə həmçinin bildirilir ki, Huang 1993-cü ildə əsasını qoyduğu şirkətin prezidenti və baş icraçı direktoru vəzifələrindən, eləcə də direktorlar şurasındakı üzvlüyündən ayrılıb. Onun istefası elan edildikdən sonra şirkətin səhmləri birja ticarətinin əvvəlində 14 faizdən çox ucuzlaşıb, lakin sonradan yenidən bahalaşmağa başlayıb.
