BDYPİ təhlükəsizlik kəməri ilə bağlı çağırış edib.
İnsanoid.com DİN-in mətbuat xidmətinə istinadən çağırış mətnini təqdim edir:
"Təhlükəsizlik kəməri sürücü və sərnişinlərin həyatını qoruyan ən vacib vasitələrdən biridir. Dəfələrlə sübut olunub ki, kəmərdən istifadə edən şəxslər yol-nəqliyyat hadisələri zamanı daha az xəsarət alır, bir çox hallarda isə məhz bunun sayəsində həyatda qalırlar.
Təsadüfi deyil ki, 2026-cı ilin ilk 10 ayı ərzində yol qəzalarında həlak olan sürücü və sərnişinlərin 32,1 faizi, xəsarət alanların isə 30,9 faizi təhlükəsizlik kəmərindən istifadə etməyən şəxslər olub.
Baş Dövlət Yol Polisi İdarəsi (BDYPİ) bildirir ki, ötən gün Şəmkirdə iki gəncin ölümü, bir nəfərin isə ağır xəsarət alması ilə nəticələnən qəzanın təhlili təhlükəsizlik kəmərinin əhəmiyyətini bir daha gündəmə gətirir. Bir neçə dəfə aşaraq yol kənarına yuvarlanan avtomobildə kəmərdən istifadə edilsəydi, qəzanın nəticələri daha yüngül ola bilərdi.
Qanunvericiliyə əsasən, həm sürücü, həm də sərnişin təhlükəsizlik kəmərini bağlamalıdır. Sürücü sərnişinlərin də kəmərdən istifadə etməsinə nəzarət etməklə qanunun tələbini yerinə yetirmiş və mümkün hüquqi məsuliyyət riskini azaltmış olur.
Sərnişinlər isə təhlükəsizlik kəmərini bağlamaqla ilk növbədə öz həyat və sağlamlıqlarını qoruyurlar.
BDYPİ sürücüləri və sərnişinləri təhlükəsizlik kəmərindən mütləq istifadə etməyə çağırır.
Unutmayaq: Avtomobildə təhlükəsizlik kəməri bizi həyata bağlayan bağdır!"
