Təqvimlər 11 noyabrı göstərir. Bu gün uşaqlığımızın, gəncliyimizin, ən saf xatirələrimizin qəhrəmanı, milyonların qəlbində "Şaban" adı ilə taxt quran böyük sənətkar Kamal Sunalın doğum günüdür.
İnsanoid.com xəbər verir ki, o, 1944-cü ilin 10 noyabrında dünyaya göz açmışdı. Amma Mustafa Kamal Atatürkün vəfat etdiyi bir gündə özünə şənlik qurmağı, ad günü keçirməyi vicdanına sığışdırmamış, doğum gününü bir gün sonraya – 11 noyabra daşımışdı. Elə bu incəlik belə onun nə qədər böyük ürəyə, nə qədər dərin ruha sahib olduğunu göstərməyə yetir.
Ekranlarda gördüyümüz o sadəlövh, saf, bəzən dəliqanlı, amma hər zaman ədalətin və mərhəmətin yanında dayanan qəhrəmanların arxasında, əslində, çox ciddi və bir az da kədərli adam dayanırdı. Kamal Sunal bizə sadəcə gülməyi öyrətmədi. O, yoxsulluğun içində qüruru qorumağı, haqsızlığa qarşı təbəssümlə mübarizə aparmağı, ən qaranlıq günlərdə belə ümidini itirməməyi aşıladı.
2000-ci ilin 3 iyul səhəri isə illərlə minməkdən çəkindiyi təyyarəyə mindi və ürəyi bu səfərə dözmədi. O gün aramızdan cismən ayrılsa da, heç vaxt unudulmadı. Çünki hər dəfə televizorda onun o məsum gülüşü görünəndə, evlərimizə yenidən bahar gəlir, gözlərimiz dolsa da, dodaqlarımız qaçır.
Doğum günün mübarək, gözəl insan! Sən bizi güldürərək həm də böyütdün, saflaşdırdın. Ruhun şad olsun, böyük ustad. Sən yaşadıqca, bizim içimizdəki o uşaq da heç vaxt ölməyəcək.
