Ermənistan parlamenti TRIPP layihəsi çərçivəsində şirkətin yaradılmasını nəzərdə tutan qanunvericilik paketini birinci oxunuşda qəbul edib.
İnsanoid.com Ermənistan KİV-ə istinadən xəbər verir ki, qanun layihələri noyabrın 12-də parlamentin növbədənkənar iclasında müzakirəyə çıxarılıb. Səsvermədə iştirak edən 64 deputatın hamısı paketin lehinə səs verib.
Müxalifətdəki "Güclü Ermənistan" və "Ermənistan" bloklarının deputatları isə iclasda və səsvermədə iştirak etməyiblər.
Paketə "Səhmdar cəmiyyətlər haqqında" qanuna və digər əlaqəli qanunvericilik aktlarına dəyişikliklər daxildir.
Bununla yanaşı, Ermənistan Prezidenti Vaaqn Xaçaturyan ABŞ ilə TRIPP layihəsi üzrə Strateji Əməkdaşlıq haqqında Çərçivə Sazişinin ratifikasiyasına dair qanunu imzalayıb.
"Armenpress"in məlumatına görə, prezident sənədi noyabrın 10-da imzalayıb. Həmin gün o, Sülh Şurasının Nizamnaməsinin ratifikasiyası haqqında qanuna da imza atıb.
Xatırladaq ki, Ermənistan parlamenti oktyabrın 28-də ABŞ ilə TRIPP layihəsi üzrə Çərçivə Sazişini 63 lehinə, 32 əleyhinə səslə ratifikasiya edib. Sülh Şurasının Nizamnaməsi isə 90 lehinə, 8 bitərəf səslə qəbul olunub.
