Nyu-Yorkun məşhur "Empire State Building" göydələninə təhlükəsizlik avadanlığı olmadan qalxan rusiyalı bloger İvan Birkus və rəssam Angela Nikolau yenidən gündəmə gəliblər.
Cütlük "Good Morning America" verilişinə müsahibəsində hazırda toy deyil, məhkəmə barədə düşündüklərini bildirib.
"İndi toy barədə heç bir planımız yoxdur. Yalnız məhkəmə haqqında düşünürük", – İvan deyib.
Angela isə məhkəmə prosesinin onlarda ciddi stress yaratdığını bildirib.
Müsahibə zamanı jurnalist cütlükdən artıq evli olub-olmadıqlarını soruşub. Angela cavab verməyə başlayarkən vəkilləri dərhal müdaxilə edərək: "bu sualı keçin!" – deyib.
Cütlük təhlükəli hərəkətlərini incəsənətin bir forması hesab edir. Jurnalistin "sənətiniz uğrunda ölməyə hazırsınız?" sualına isə hər ikisi "bəli" cavabını verib.
Xatırladaq ki, bu il iyulun 1-də cütlük Nyu-Yorkdakı "Empire State Building" göydələninin zirvəsinə qalxaraq sülh çağırışı yazılmış banner açıb. Bundan sonra İvan Angelaya evlilik təklifi edib. Hadisə yerinə polis və helikopter cəlb olunub. Aşağı endikdən sonra cütlük saxlanılıb və barələrində cinayət ittihamları irəli sürülüb.
