Kənd Təsərrüfatı Nazirliyi tərəfindən keçirilən “Şəhərdən Kəndə” layihəsi çərçivəsində Şamaxıda fermer təsərrüfatına dəstək göstərilib. Bu barədə 8 dekabr tarixində Nazirliyin rəsmi səhifəsində məlumat verilib.
Dəstək Şamaxı rayonunun Qaladərəsi kəndində yerləşən fermer Ceyhun Nuriyevə məxsus arıçılıq təsərrüfatına olub. Layihə çərçivəsində təsərrüfat sahibi aqroturizm modulu üzrə keçirilən xüsusi təlim proqramında iştirak edib və proqramı uğurla tamamlayıb. Sözügedən təsərrüfatda yenidənqurma və abadlıq işləri aparılıb.
Qeyd edək ki, layihə çərçivəsində bu günə qədər təlimlərdə 115 təsərrüfat sahibi iştirak edib. Ümumilikdə isə layihəyə qoşulmaq üçün 200-dən artıq aqrar sahibkar qeydiyyatdan keçib. Baxış keçirilən 134 fermer təsərrüfatından 97-si aqroturizm fəaliyyətləri üçün uyğun hesab edilib.
