Şamaxıda mərkəzdən 22 km. aralı məsafədə yerləşən Çuxuryurd–Sis–Qaleybuğurd–Keçməddin–Qaladərəsi avtomobil yolunda uçqun baş verib. Yoldakı vəziyyətlə bağlı Ekologiya və Təbii Sərvətlər Nazirliyinin əməkdaşları əraziyə gediblər. Bunu yanvarın 13-də APA-ya nazirliyin rəsmisi Əli Əliyev deyib.
Onun sözlərinə əsasən, uçma prosesi yolun kənarında 3 metr hündürlüyündə, 10 metr uzunluğunda qeydə alınıb: “Bu, 9-10 metrlik yolun kənarında klassik uçma prosesidir. Ağsu, İsmayıllı, Şamaxıda belə proseslər tez-tez baş verir”
Qurumun nümayəndəsi əlavə edib ki, hazırda yol bağlı deyil və asfalt örtüyünə ciddi ziyan dəyməyib.
“Mövsümdən asılı olaraq bu zona üçün xarakterik prosesdir. Ciddi sürüşmə prosesi deyil. Yolun sol çiynində 1.5 metrlik çat əmələ gəlib. Bu da yol üçün elə bir təhlükə yaratmır”, - deyə o, vurğulayıb.
