Dövlət tibb protokoluna əsasən, hamilə olan qadın ayda bir dəfə həkim müayinəsinə getməlidir. Həkimin qəbulu üçün hamilə hər dəfə 10-150 (dövlət və özəl) manat arası pul ödəməli olur. Digər tərəfdən, hər bir qadın hamiləlik dövründə ən azı 3 dəfə ultrasəs və 1 dəfə doppler (3D) müayinədən keçməlidir. Burada qiymətlər 20-150 manat arası dəyişir, tək doppler isə 70 manat və daha yuxarı qiymətədir.
Paytaxtın doğum evlərində qeyri-rəsmi qiymətlər 400 və 800 manat arasındadır. Məsələn: Respublika Kliniki Xəstəxanasında təbii doğuş üçün bizə 400 və 600 manat deyildi, qeysəriyyə əməliyyatı isə 700 manat. Qara Qarayevdə yerləşən 7 saylı doğum evində doğuş 400 manat, qeysəriyyə əməliyyatı isə 800 manata başa gələcək. 3 saylı Sabunçu Xəstəxanasında qiymətlər 300-500 manat arası dəyişir. Bu pul ancaq doğuşun aparılması üçün xərclənən vəsaitdir. Pasiyentin xəstəxanada qaldığı günlərdə həkimə, tibb bacısına, dayəyə verilən pulu da bura daxil etsək, büdcə daha da böyüyür.
Paytaxt xəstəxanalarında ana ilə körpə 5-7 gün qalır. Üstəlik əksər dövlət xəstəxanalarında ana üçün yeməyi kənardan yaxınları gətirməlidir. Bu isə ən azı gündə 3 dəfə qidalanmaq üçün əlavə xərcdir. Uşağa aid olan ilkin ləvazimatların (pampers, süni qida, dəyişək paltar) hər birini öncədən valideynlər alıb tibbi personala verməlidir. Beləliklə, minimal 1 qutu yeməyin ən aşağı qiyməti 8 manat, 1 böyük qutu pampersin minimal qiyməti 12 manat və pal-paltar, əski, uşaq üçün əmzik 30-50 manat arası başa gələcək.
Özəl klinikalarda doğuş etmək minimal 760 manatdan başlayacaq. Buraya 2 gün qalmaq, ananın qidalanması, uşağa aid bütün xərclər daxildir. Belə ki:
| Klinikalar | Təbii doğuş | Qeysəriyyə |
| Baku Medikal Plaza | 1200 AZN | 1400 AZN |
| “Oksigen” klinikası | 1000 AZN | 1300 AZN |
| “German hospital” | 900 AZN | 1200 AZN |
| “Bono Dea” | 1800 AZN | 2500-3000 AZN |
| “İnternational” | 750 AZN | 1050 AZN |
| Mərkəzi Gömrük Hospitalının nəzdində “Bahceci” | 1500 AZN | 1750 AZN |
| Caspian İnternational Hospital | 1000 AZN | 1200 AZN |
| Vital Klinika | 760 AZN | 1000 AZN |
| Leyla Şıxlinskaya | 1200 AZN | 1400 AZN |
