Müstəqil aqrar sığorta eksperti vəzifəsində işləmək istəyənlər üçün növbəti imtahan oktyabrın 31-də keçiriləcək. Bu barədə məlumat 15 oktyabr tarixində Kənd Təsərrüfatı Nazirliyinin rəsmi səhifəsində yayılıb.
Test imtahanını uğurla başa vuran namizədlər Aqrar Sığorta Fondunun təşkil etdiyi təlimlərdə iştirak edəcəklər. Həmin ekspertlər sığortalanma prosesində təsərrüfatlara baxış keçirib, buradakı vəziyyəti və riskləri qiymətləndirməlidir. Sığorta hadisəsi baş verdikdə isə hadisənin səbəbini müəyyən edərək dəyən zərəri hesablamalıdır. Ekspertlərin təsərrüfatlara gedişi zamanı qət edilən məsafəyə görə yol xərci ödənilir.
Müstəqil aqrar sığorta eksperti bütün dünyada, o cümlədən Türkiyədə də yüksək gəlirli peşələrdən sayılır. Ölkəmizdə avqust ayında ən çox gəlir əldə edən 3 müstəqil aqrar sığorta ekspertlərinin aylıq gəlirləri müvafiq olaraq 7 795 manat, 5 225 manat və 4 366 manat təşkil edib. Digər mütəxəssislərin də aylıq gəlirləri 1 000 - 4 200 manat arasında dəyişib.
İmtahanda iştirak etmək üçün aqronom, baytar və digər əlaqədar peşələrə malik namizədlər oktyabrın 29-dək Dövlət İmtahan Mərkəzinin internet səhifəsində qeydiyyatdan keçməlidirlər.
